緣起 #
喺幾年前開始，我睇完啲韓劇就會寫低自己嘅諗法再po上IG private account度。與其話係俾啲friend睇，其實更多想記錄低自己嘅諗法。之後開始睇吓動畫睇吓戲，好多時睇完都會喺間房度行嚟行去，喺個心入邊係咁諗呢個番點、呢個結局點，其實都係想同人講吓自己點諗。而今日終於扚起心肝，買咗一個domain，開咗呢個網。
點樣講？ #
睇到呢一度嘅你已經留意到，呢篇文並唔係用書面語寫。包括呢一篇文在內，我喺呢一個網度寫嘅所有文都會用香港人講嘢嘅「方式」寫出嚟。我呢度用「方式」而唔係用「語言」，係因為本身香港人講嘢就係會用好多唔同嘅語言，大部份情況下都係中英夾雜，甚至乎有時會講吓國語、韓文、日文等等其他語言。所以如果你話香港人應該要淨係講廣東話嘅話，我會覺得呢個係幾無謂嘅執著。
講咩？ #
喺呢個網度講咩其實都冇一個好確實嘅決定，主要就講吓對影視作品嘅諗法，可能都會講吓最近聽嘅歌，甚至乎講吓哲學。不過幾肯定就係唔會講我嘅個人生活，至少唔會講關於有可能透露我身份嘅嘢，到時俾人相認就尷尬啦。同埋可以確定嘅係，呢個網度寫嘅所有文都會係我自己嘅諗法，唔會有任何一隻字係由AI打出嚟嘅。
《純粹覺得》 #
以至於點解會改呢個名，係因為我作為一個唔係讀好多書，又唔係睇好多戲嘅人，好自然地都講唔到啲咩高見出嚟。大部份時候都唔會點樣細諗，只係「純粹覺得」套戲點點點或者套劇點點點，講吓我睇完之後嘅感受。所以唔好期望喺呢度可以有啲咩得着，你就當係我個人嘅筆記簿唔小心公開咗出嚟俾人睇。啱睇嘅就睇，唔啱睇嘅就歡迎唔好睇。
