前言 #
喺呢篇文度就總結一下喺2025年睇過嘅影視作品當中，喺唔同方面最為突出嘅作品。以下嘅作品只會提及喺2025年我新睇嘅作品，絕大部份都唔係喺2025年出品，而且翻睇嘅作品亦唔會列入考慮當中嘅。
純粹覺得最好睇嘅劇 #
2025年都係睇咗唔少劇，中間甚至有段時間係咁睇韓劇添，不過依家反而覺得開套劇出嚟睇要花好多時間負擔好重……呢一年都睇咗啲唔錯嘅劇嘅，而當中最突出嘅大概就係《小女子》。
作為只有12集嘅劇集，睇之前已經有啲期待，因為通常16集嘅韓劇都會有啲支線去掗時間，而Netflix出嘅12集韓劇都係比較去蕪存菁，節奏緊湊好多。雖然係一套冇乜人提及過嘅劇，但係我覺得係非常好睇。每集都非常緊湊，永遠估唔到之後發生咩事。拍攝手法都好符合我理想中嘅模樣，我會話如果我拍套劇出嚟嘅話大概都會係咁。
另外覺得好睇嘅有《機住》、《苦盡柑來》、《未知的首爾》、《你和其餘的一切》同《切爾諾貝爾》。
純粹覺得最好睇嘅番 #
喺2025年睇過最好睇嘅番毫無疑問就係《Solo Leveling》。當然佢嘅劇情並冇任何驚喜可言，但係可以肯定嘅係由頭睇到第二季完，都係爽到仆街。當然做一套爽番嘅門檻係低於做一套有深度嘅番啦，但必須承認嘅係有唔少爽番都係好垃圾，而做到一套持續地爽，而且係非常爽嘅爽番都係有一定嘅門檻。而且最重要嘅係，我真係爽吖嘛。
其餘覺得唔錯嘅，有收尾令人期待嘅《我推》、唔錯鳩嘅《艾莉同學》、《夏日時光》、《2.5次元》同《地》。
純粹覺得最好睇嘅戲 #
2025年都冇乜點睇戲，淨係年尾先開始睇吓。如果要我揀嘅話大概就係《PTU》。雖則劇情冇乜特別，但勝在氣氛營造一流。如果冇聽豬文介紹嘅話，可能就會係《非常突然》，可惜知道有幾突然發法就冇乜驚喜。
純粹覺得配樂最好聽嘅影視作品 #
私心頒比《機住》，陣容鼎盛就不在話下啦，本身配樂都好聽，有啲soundtrack都喺我而家嘅playlist入邊。其餘冇乜印象邊套作品嘅配樂比較突出。
純粹覺得最驚喜嘅影視作品 #
《小女子》其實都幾驚喜，不過已經俾咗最好睇佢嘅話，再比最驚喜嘅話就好似有啲過分。
《2.5次元》我會話驚喜程度係相等於《小女子》，齋睇標題以為係鳩番，實際睇原來都有啲認真嘢，而且都講得相當唔錯，真係估佢唔到。
純粹覺得最難睇嘅影視作品 #
《盾之勇者》一定係當之無愧；非常後悔睇咗三季；想見證人類嘅下限可以睇吓。
純粹覺得最失望嘅影視作品 #
王家衛系列嘅都幾失望吓，不過主要更多係我唔識欣賞啦。
《夏天隧道》都相當失望吓。一直都想睇好耐，但最重要嘅橋段係完全講唔通，唔明點解咁都可以上到大銀幕……
後話 #
2026年除咗希望睇到啲好片之外，亦都希望短評可以準時啲出。另外就係有關入場睇嘅戲，因為其實25年係有入場睇幾場戲嘅，不過都冇寫到落短評到，雖然因為慳錢同聽唔明英文入場嘅機會細咗好多，但係如果入場嘅話都希望會寫返短評。係咁！
