劇：《你和其餘的一切》 #
Came for 金高銀，stayed for 朴智賢（演另一女主角——千商燕）嘅演技！
呢套劇對我嚟講就係用15集問一個問題：你會唔會原諒一個同你最close但係由頭仆街到落腳趾尾嘅friend？至少我係原諒到，因為好長時間我都係好討厭商燕，但係到最後我都係原諒咗佢，因為「佢係仆街」同「佢係慘」呢兩件事係冇衝突㗎。呢套戲好好咁喺後面呈現返商燕慘嘅嗰面，與此同時又唔會過火得滯變到好左膠咁，呢個就係呢套劇好睇嘅地方。
劇：《今際之國的闖關者》第一季 #
睇完遊學修講做試當真最high其中個位就係試玩毛扮佢就開咗嚟睇，睇完第一季就棄咗。實在唔覺有咩好睇，最後一個game嘅扭橋仲要係無聊到爆。聽講第三季都唔好睇，咁就多個理由棄啦。
劇：《我的大叔》 #
又係唔明點解啲人會講到咁神嘅劇。有啲對白係幾正嘅，「日子過得好嘅人容易做好人」、「逆來順受嘅無期徒刑囚犯」呢啲係幾正嘅，但我始終對朴東勳（男主角）呢種爛好人真係冇乜feel。唯獨是朴尚勳（男主角大哥）係幾好笑嘅。後面喺喪禮度乾杯又係笑到仆街，呢個喪禮又係我睇過最warm最其樂融融嘅喪禮。但整體而言真係冇乜感覺……
劇：《浪漫速成班》 #
之前見到鄭少女已經想開嚟睇。
但係個劇本實在唔太掂。又係嘥咗個主題，其實啲學生線可以玩得深入好多，補習又可以講吓又冇講過，最後南行慈（南行善家姐，南海伊阿媽）返嚟更加係多鬼餘。金榮珠（女主角老死）嘅埋尾又有啲多咗。扭橋係估唔到嘅，但就稱唔上好睇囉。
劇：《閃亮的西瓜》 #
前中段幾正，但整體太bbq，好似睇咗十幾集寶礦力廣告咁，太過青春洋溢。結局少少跳。尹清雅（主角阿媽）屋企嘅事件有啲多咗，店長係外公都多左啲。好似好多演員都係新演員，好多演技都好一般……
最正都係申銀秀（演年輕時期尹清雅）同中間段扭橋。申銀秀真係勁cute！段扭橋又係精彩，光明正大咁影晒出嚟俾你睇都唔會知道，超級surprise。
