番：《火影忍者》 #
一個禮拜睇完真係黐撚線！不過skip原創加兩／四倍速咁睇係快少少㗎啦。打鬥中間嘅回憶開四倍，冇乜特別嘅劇情或者打鬥開兩倍，咁睇舒服好多。尤其每次出一招影十條友嘅反應真係好煩。雖然我覺得比較合理嘅速度可能係1.5倍，不過應該教唔到所以冇計。
卡卡西班嘅劇情都一般，比較好睇嘅係鹿丸同小李，雛田打寧次嘅劇情都唔錯。打鬥比較好睇嘅係小李打我愛羅、最後佐助打鳴門。最失望係三代目打初代同二代目，後面幾集都係喺度同大蛇丸來回抽插唔知做乜鳩，暗部又淨係識得做前排觀眾。劇情最失望係佐助出走嗰part，前面講到話要出生入死，後面見到佢出個螺旋丸就話要反面，始終唔係好說服到我點解決定要出走。對比家教我覺得都係家教好睇啲，家教每個屬性嘅特點再分明啲。
聽講疾風傳仲不如序章，唔求好睇但求睇完。
戲：《上流寄生族》 #
構圖好好睇。第一次睇嗰陣覺得劇情都好緊湊好正，再睇就冇乜感覺。
劇：《切爾諾貝爾：傷心的兒童》／《Chernobyl》 #
我唔會叫佢做神劇但的確幾好睇。嗰種極權統治體下嘅審查同階級制度都好有《一九八四》嘅感覺。最後嗰集解釋返到底出事嘅原因係咩都好清楚，就算好似我咁唔識核電廠原理嘅人都聽得明。唯一嘅敗筆就係講英文。
戲：《旺角卡門》 #
對比往後王家衛嘅戲嚟講，呢套都仲未係好文藝片。一句總括就係MK故事，冇咩好講。
戲：《古惑仔》第一至三集 #
為咗睇烏鴉而睇，結果烏鴉冇我想像中咁好笑，可能我喺IG已經見得太多，唯一幾好笑嘅係佢跟住佢大佬後面行喺度打拳嗰幕。
戲：《阿飛正傳》 #
Fuck boy故事；開始文藝片feel；冇咩好講。
戲：《重慶森林》 #
第一段故事冇乜feel，反而第二段何志武（梁朝偉演）幾好笑！越嚟越睇唔明王家衛啲戲其實想點……
