戲：《東邪西毒：終極版》 #
有可能係我睇王家衛最睇唔明嘅戲，真係越睇越閪迷。不過有啲鏡頭係幾得意嘅，個雀籠喺度轉嗰度都幾正，打鬥啲聲音設計都幾得意。但劇情上真係唔知做乜……
戲：《蝙蝠俠—黑夜之神》／《The Dark Knight》 #
睇太多王家衛開返啲主流片嚟睇。
再睇返個開場已經冇之前睇咁high；小丑呢個角色真係好正；其實套戲問咗好多個問題值得去細諗；掉轉地址又係好正。
戲：《墮下的對證》 #
翻睇多次依然好睇。成套戲就係不斷來有罪定無罪。成套戲都冇non-diegetic（故事世界以外）嘅音樂，Daniel（個細路仔）彈鋼琴嗰陣勁有feel。俾我拍戲可能都會係咁樣再加埋全程定鏡。
最慘始終係隻狗！
戲：《墮落天使》 #
逼人幫襯真係笑到傻。其餘往常地唔係好知想點。
戲：《審死官》 #
突然走投無路到開啲周星馳片嚟睇吓，結果又唔覺得好笑，冇咩好講。
戲：《春光乍洩》 #
啲黑白畫面幾有《Better Call Saul》feel（或者應該係做返轉？），起身煮飯嗰度幾好笑。
一句講完就係兩個男人喺阿根廷嘅離離合合。冇咩好講。
戲：《花樣年華》 #
簡單咁講，就係兩個人出咗軌，但係覺得自己冇出軌嘅故事，冇咩好講。
戲：《國產凌凌漆》 #
又諗住開返啲笑片嚟睇，不過啲梗已經聽得太多次，唯獨是係間諜凳冇乜點聽過幾好笑。其餘一般。
戲：《鼓動真我》／《Whiplash》 #
我唔肯定之前有冇睇過成套戲啦，但係我係有印象最後嗰一幕Neiman（男主角）擅自開始打鼓嘅。
講真由一開始我已經唔鐘意Fletcher。由開頭嘅一啖砂糖一啖屎，到之後搵Ryan入團谷佢气，我都覺得Fletcher係極度manipulative嘅人。所以我係極反對佢嘅教學方式，都唔明點解啲人會睇到high，不過我之後發現導演同好多人都係同我同立場。
我會認同為咗夢想廢寢忘餐，放棄女朋友，唔理其他人意見一意孤行，頭破血流然後成為世界冠軍咁樣係一個good story，但係咁就係咪可以代表Fletcher咁嘅教學方式係啱嘅呢？有人因為咁樣嘅教學方式而成功，同咁嘅教學方式可以令人咁大機會成功，同我哋應該用呢種教學方式係三件事。有咁嘅個例並不代表佢係有效嘅教學方式，就算係有效都未必代表我哋應該要咁做，但係好多人見到有個例就直接跳到去我哋應該要咁做。我諗Fletcher會話呢個係唯一方法培養出頂尖嘅音樂人，但係先唔講呢個係咪真係唯一方法，就算係咁又係咪代表你可以咁樣害死其他學生呢？
番：《火影忍者疾風傳》 #
終於補完一個童年回憶。繼續以倍速加飛動畫原創咁睇，歷時54日。
之前已經聽聞忍界大戰爛尾，都估唔到真係咁爛。揭牌斑係帶土（卡卡西老死）係有啲驚喜嘅，但係感覺都係臨時諗出嚟，後面輝夜姬嗰part感覺上都係諗唔到點完就求其作啲故仔出嚟。另一個重點係佐助所有感情轉換都係莫名其妙，點解知道真相之後仍然想報仇，同聽完初代火影之後又轉軚其實都係冇乜點講到個過程。
《火影》整體嘅打鬥都一般，序章（《疾風傳》前）都還好，《疾風傳》（唔計忍界大戰）真係滑咗牙，其一就係近乎冇用過五行嘅系統，其二就係成日都用替身術，你話影分身都話有啲煙出嚟，分唔到都合理啲啊，替身術真係任你講㗎喎，明明影住你打中佢都可以話係替身，每場都係咁打真係好冇癮。同埋我依家都唔係好知輪迴眼有咩用……
疾風傳唯一重點就係鼬（佐助阿哥），真係好撚型……
戲：《通往夏天的隧道，再見的出口》 #
製作係唔差嘅，但我會話條橋係fundamentally唔work囉，明明山窿入面嘅世界係慢咁多，杏子（女主角）收到短訊嗰吓其實點會唔入去呢？講到明明佢咁鍾意薰（男主角）喎，又話冇咗佢唔得，嗰吓完全冇講到點解唔入去囉。
戲：《一秒拳王》 #
情況類近，都係製作唔錯嘅，但係劇情上實在係太老土，撞車之後我完全分晒心完全唔想睇。
我想問港產片係咪一定要有一啲唔識講廣東話嘅人……？
戲：《米奇17號》／《Mickey 17》 #
又係情況類近，原本我就係當普通荷里活片睇，之後佢一講原住民嗰句對白我即刻出晒戲，又係完全唔想睇落去。我一直都唔係反對呢啲DEI嘅理念，但係你一講到咁白就好難睇好出戲。
戲：《PTU》 #
聽返荼毒室啲live之後開始想睇返啲港產片，其中就包括銀河映像系列，雖然其實更加主要嘅係杜琪峯系列。
氣氛營造一流，啲特種部隊直程惡過黑社會，不過我係唔知原來特種部隊係要行街嘅。
戲：《2046》 #
喺睇之前我一直都以為係套未來片，點知原來「2046」只係個房number。唔知係睇得多王家衛定本身個劇情係易follow定係點，感覺開始識睇佢嘅戲：就係唔睇劇情，純粹去feel個氛圍係點。
戲：《非常突然》 #
一句講晒就真係「非常突然」。可能本身我就唔太理解當時香港嘅氛圍啦，所以都對呢首係入邊嘅隱喻冇乜感覺。再加上聽過豬文講點樣突然法所以又冇乜太大驚喜。唯獨是係李森（劉青雲演）幾好笑，喺醫院嗰幕玩輪椅又係笑到仆街。
後話 #
呢個月係咁睇戲，真係寫到我仆街！
