前言 #
這篇短評係喺2025年4月寫嘅。喺內容冇變，只係修改格式、用字之後放上嚟《純粹覺得》。
劇：《機智醫生生活》 #
用藍光重溫，但係因為藍光係director’s cut啲字幕係對唔上，結果我要人手去較每一集嘅字幕timestamp，搞到我睇嘅時候冇乜feel。不過反而令我有啲客觀咁去睇佢嘅時間分配，而家覺得第二季後面其實冇咁趕。
第二季嘅playlist依然係神。期待申PD新作！
番：《龍與虎》 #
唔想睇未完嘅番唯有睇舊番。其中一套被推薦嘅番，但感覺冇話特別好睇。
Tiger係幾cute。學園祭幾好睇，其餘真係冇咩特別感覺。
番：《老夫老妻重返青春》 #
日常ppt；幾溫馨幾好笑；冇咩好講。
劇：《我們的浪漫電影》 #
朴寶英新劇當然要睇，我感覺而家鐘意朴寶英多過金所炫添。
又係短篇令我過份期待。個vibe係幾似那年夏天嘅，好幾集嘅結尾都好吸引我睇落去，但係亦僅僅如此。電影嘅部分發揮得唔夠多，主題性唔強，劇情亦冇乜太驚喜嘅部分，唯一就係高峻（男主角阿哥）死之後竟然係直接跳到講高謙（男主角）點釋懷；但係本身我對阿哥又冇乜feel。孫珠雅（支線個女角色）更係令人覺得莫名其妙。當初因為啲濕鳩理由分手都算，然後淨係為咗自己套戲搵返人地，俾多次假希望hurt多次人地。有咩理由話人地自私？根本最自私就係你！
我只想問：所以到底朴寶英幾時先接到校園劇嚟做？
劇：《浮遊先生》 #
一句講晒就係冇乜感覺。當初又係見到少集數有啲期待，turns out根本冇關係，睇完都係對所有線冇feel。印象最深刻就係講喺孤兒院嗰個intro，實在係太正啦：「神愛細佬，但係佢陪唔到每個細路，所以佢就創造咗媽媽，但係佢做嘅媽媽數量唔夠，所以有啲細路只能夠等媽媽嚟揀佢哋。」然後再影佢每次迎合領養嘅人嘅喜好都係冇俾人揀，真係好撚諷刺。
番：《夏日時光》 #
澪最高！澪係唯一正解！
劇情幾緊湊刺激，製作都相當唔錯，尤其係喺學校打鬥嗰場根本係電影級數。唯獨是係個結局太美好，同埋都係大路time travel片嘅問題，前面全部都係自由意志最後又變咗命定論，除此之外都冇咩問題。
好羨慕窓（男主角慎平個friend）可以同兩個澪一齊！
劇：《喜歡的話請響鈴》 #
可謂一切嘅開端！
之前覺得應該要揀黃宣梧（第一季嘅男朋友），再睇覺得其實同李惠永一齊先正路。
問題有兩個，其一就係個設定玩得太差了，呢個咁簡單嘅設定發揮空間好大，但係用到嘅地方真係唔多。其二就係佢結局係想強調金朝晀（女主角）用佢自己嘅意志去選擇，但係首先佢都唔似係自己去選擇，佢都係比李惠永打動到，而且除咗喺結局之外我都感受唔到佢係自己去揀，最可惜都係第一點，真係太浪費咗呢個setting啦。相反嘅例子應該就係《無用嘅謊言》，同樣係簡單嘅設定，劇情大路但相對而言玩個setting玩得意外地唔錯。
